ريهام سعيد تهاجم من يتهمها بالمتاجرة بمرضها في أول فيديو لها بعد شفائها
في أول ظهور إعلامي لها بعد شفائها خرجت الإعلامية ريهام سعيد، بمقطع فيديو عبر حسابها الشخصى، بموقع الصور الشهير إنستجرام، للرد على الأشخاص الذين يتهمونها بالمتاجرة بمرضها.
وقالت سعيد فى مقطع الفيديو “انا شيفاها سفالة وقلة ذوق وقلة رحمة، هل انا هقعد حابسه نفسى فى البيت شهر علشان امثل انى تعبانه؟، هل انا لميت تبرعات على مرضى ؟، هل لما تعاطفت معايا مرتبى زاد ؟، انا ست كويسة غصب عنك، ربنا بيبتلينى علشان بيحبي، انا مطلعتش اعيط للناس واعمل فيديوهات واقول الحقونى، على فكرة انا بقالى 3 شهور عيانة ومقولتش لحد، دايما قوية وعمرى ما تاجرت بحاجة”.
وأضافت “انا مبحبش اصعب على حد ومبحبش حد يتعاطف معايا، وانا ست قوية جدا بايمانى بالناس إلى هتقف معايا، انا عملت خير كتير جدا فى حياتى وواثقة ان ربنا هيطلعنى من اى حاجة وحشة، هو انا اصلا كنت محتاجة تجميل فى مناخيرى ؟ ولا محتاجة تجميل فى اى حاجة ؟، وحتى لو عملت عملية تجميل انت مالك، دى حرية شخصية، انت مالك، انا تعبت وكنت بموت زى اى واحد، للناس المريضة دى، على فكرة مبيكذبش غير الكذاب ومبيخونش غير الخاينين، يعنى شريف مدكور لما كان بيستقبل الناس فى بيته يبقى كدا هو مكنش عنده كانسر ؟، كان بيمثل ؟، هل هو الواحد لازم يموت علشان ميكنش بيمثل، هل لازم يكون خبر وفاتى انهاردة علشان تقول انها مش بتكذب”.
واختتمت كلامها “انا كنت عيانة وخفيت وراجعة احسن واقوى من الاول وراجعة برنامجى وهيبقى احسن من الاول، باذن الله باذن الله، يوم الحد هتبقوا مكسوفين اوى علشان كنت مصورة كل إلى حصل، اد ايه هى حاجة قذرة انك تثبت للناس انك كنت بتموت، انا قلت لما اموت ادعولى مش اتعاطفوا معايا، انا مش عايزة اصعب على حد انا طلبت الدعاء بس، الدكتور لما تشوفوه هيقولك إلى حصل دا معجزة، كان علطول يقولى انتى محتاجة معجزة، لو مستكتر عليا ان انا اخف دى مشكلتك، لو مستكتر عليا ان انا ارجع شغلى واعيش حياتى، وكنت عاوز خبر وفاتى للاسف دا مش وقتى”.
